Wednesday, October 06, 2004

Cheney v. Edwards

Kao un hongge este na dos? Pumalakse todu tiempo. Lao atan Si Cheney, mas atdet iyo-na, sa' kada Si Edwards ha tacha gui', sumuhayi Si Cheney, tumayok yan sumuhayi. Si Cheney chumaka' i record bobota Si Kerry. Ineppe-na Si Edwards, parehu iyo-mu, ya bula lokkue ni' baba hun gi i record bobota-mu. Lao hafa repuesta-na Si Cheney nu i tinacha-na Si Edwards? Sumuhayi, ilek-na baba ha', hokkok ha' i record-na Si Kerry. Hokkok ha'.

Ai na'ma'ase, ga'na-ku Si Ralph Nader yan Peter Camejo kinu este siha na mampolitikat. Manaklalu todu, sa' ekungok Si Kerry yan Si Bush, "bai hu puno' i terrorists siha. Bai hu peska, kahat yan puno' todu siha antes di sina ma hatme hit." Ai na'ma'ase, sa' atan Iraq pa'go, sigun i mediku siha gi i espitat Iraqi, pinat maninnosensia ni' manmamatai.

Esta annok na ya-na Si Bush este na gera, sa' Guiya tumutuhun i dinimalas. Lao ya-na Si Kerry lokkue na ta konsigi mo'na gi este na karrera. Ai LAIME!

Maolekna i karreran politikat giya Guahan, sa' gof malago yu' bumota Si Unda'ut, sa' hu gof tungo' na Guiya maolekna kinu i otro na gayu. Lao guini pa'go, gi este na karreran US. Ti hu tungo' lai, baba todu, lao unu babana kinu i otro. Ai na'ma'ase, taimanu sina ma fa'na'an este na nasion "democratic" nai dos ha' na inayek para este na gof impottante na che'cho. Ti magahet este.

1 comment:

Anonymous said...

I know I'm poasu and all but can you please translate your blog into English for me, I want to read it!! I swear! Please be considerate of those of use who can't speak the language! Thank you!

LinkWithin

Related Posts with Thumbnails