Sunday, November 14, 2004

Draft fan i Balate' para u mumu giya Irak!

Letter sent out November 13, 2004 about the Draft and Guam's Balate' Population

Hafa Adai todus i manaina-hu yan mane'lu-hu siha,

Si Yu'us Ma'ase Sinot Dabit Herrera para i gefli'e na fino'-mu put i tinige'-hu. Annok na ti manchilong hit yan i taotaogues giya Amerika, pues sa' hafa na sigi ha' i Chamorro manaonao setbisisu yan tekuni i banderan US, mas ki ma respetu i banderan Guahan? Debi di ta kulu (estudia) este na hinasso mas, sa' yanggen sina ta komprende i hinasson i "mampatriotik na Chamorro siha" sina ta komprende lokkue taimanu mannina'colonized i hinasso-ta siha ni' kosas Amerika yan lina'la Amerika.

Yanggen ma fa'draft ta'lo guenao giya Guahan, debi di ta mumu ayu. Sa' yanggen maloffan ayu ta'lo, maloffan lokkue i atdet na mafa'ga'ga'n i Chamorro. Dimalas este, sa' yanggen i taotao-ta sigi ha' ma dimu pappa' gi me'nan i Amerikanu siha, kalang Si Yu'us, taihinekkok siempre este na gof baba na estao-ta pulitikat.

Gof magof-hu na en mentiona i BALATE', sa' maolek na hemplo enao para hafa sina ta cho'gue giya Guahan, para ta na'la'la' yan na'sustainable i ekonomian Guahan. I kestumbren Amerikanu yan haole na todu i "ventures" taiguini debi di u dongkalu yan gaimiprebechu. Lao para un dikike' na isla, maolekna para todu na i ventures-ta siha dikike yan dikekena. Gi fino' Chamorro, ti pumarehu gefsaga' yan riku, ya impottante este na punto. Sina gefsaga hao achokka' didide' i salape'-mu, lao ti sina rumiku. Yanggen sina ta fa'dikike' na markets siha giya Guahan, para BALATE' ya otro na tinilaika (commodities), maolekna para i taotao siha, ya mas fasit para mama'gasi, yan menos i inatotga. Hafa otro na materiat naturat ni' gaige giya Guahan, ni' sina ta na'setbe para ta fa'market? Gof impottante na ta faisen este na finaisen yan sigi ha' aligao gi i eriya-ta, sa' esta meprueba meggai biahi na ti anggokuyon yan ti dipende'yon i ekonomia ni' fina'tinas mambiaheru (tourists) siha ha'.

Yanggen mappot kumonmprende i Chamorro-hu, despensa yu'. Esta kuatro na meses desde hu dingu Guahan, ya put i hassan na chansa na sina hu na'setbe i fino'-hu, esta kalang mafnas yan machalapon gui'.

Gof mahalang yu' nu i bunitu na isla, ya Si Yu'us Ma'ase para este na chansa para bei na'lamenggua este dinechon na siniente. Kada na mana'hasso yu' taiguini put Guahan yan i metgot na taotao-ta siha, magong yu'. Adios todus, esta ki manakuentusi hit ta'lo.

Sahuma Minagahet yan Na'suha Dinagi,
Miget (Lujan Bevacqua)
"Sahuma Minagahet"
Nasion Chamoru

No comments:

LinkWithin

Related Posts with Thumbnails