Puntan Dos Amantes
****************
Puntan Dos Amåntes
Åntes na tiempo giya Hagåtña, guaha un sotterita ni’ gof
bunita ya todu ha’ gumaiya. Malago’ si nanå-ña yan tatå-ña na siha u inayeki un
rikon taotao para asagua-ña.
Lini’e i sotterita ni’ un sindalon Españot ya malago’ na u
inasagua. Ha ufresi i sainå-ña meggai na salåppe’. Sigi kumåti i sotterita
annai ma sangåni na ayu na taotao para asagua-ña.
Duru sumospiros i sotterita. Tåya’ mas guinaiyå-ña na i
lahen Chamorro ni’ sumåsaga gi sengsong. Sinangani as tatå-ña para u maleffa
ni’ lahen Chamorro sa’ popble. Tinago’ as nanå-ña na u fanosge sa’ agupa’ ha’
para u asagua. Esta ma disidi na para u asagua yan i sindålun Españot.
Annai maigo’ i dos saina, malågu i sotterita yan i
guinaiyå-ña para u attok gi liyang giya Tomhom.
Pumåra i dos un råtu gi halomtåno’ para u deskånsa sa’
mampos yayas. Ginen i chagogo’ ma hungok i essalao-ñiñiha i sindålon Españot.
“Espiha kao gaige i dos guihi guatu!”
Malågu chaddek i dos lao ai sa’ måtto gi ladera. Umatoktok i
dos.
Ti malago’ i dos umasotta. Ma godde’ i anåkko’
gapotulon-ñiha pues umañangon i dos, “hu guaiya hao.” Tuma’yok påpa’ gi taddong
hånom.
Annai manmåtto i sindålu gi kantit ya ma atan påpa’ i hanom
ma li’e’ i figuran dos taotao na uma’atoktok gi taddong tåsi.
Meggai sumåsangan na guaha na ma hungok buruka gi papa’
padiron lao siña ha’ lokkue’ ginen i napu kontra i acho’.
Comments