Sunday, May 14, 2017

I Buniton Mångga


Humånao si Jose para mamfe’ pugua’ gi halomtåno’. Gi kinekiyong-ña manli’e’ manamariyu yan agaga’ siha na manga gi mas yahulolo’ na råmas. Guaha mås ki singko gi un rasimu. Ha po’lo påpa’ i kinatgåga-ña ya ha tutuhon fumeddos i trongkon mångga. Ti åpmam hulo’ esta gaige gi un råmas ni’ manggaige i mambunito siha mångga. Ha tife’ mås ki siette na mångga ya ha balutan gi me’nan chinanå-ña.

Ha tutuhon tumunok påpa’ lao kada ha’ atan påpa’, mås chågo’ i lini’e’-ña. Sigi ta’lo påpa’ lao kada ha atan påpa’ luma’chago’ ha’ i tano’. Ha hasson maisa si Jose na kalang båba este i che’cho’-ña. “Fa’na’an ti debi bai tife’ este na mångga.” Ha li’e’ otro na dångkolon råmas lao åntes di u falak guatu ilek-ña, “Guello yan Guella, despensa yu’ sa’ ti hu tungo’ na ti debi na bai tife’ este na mångga.”

Annai munhåyan ha sångan este, ha hago’ guatu i dångkolon råmas ya ayu siña måtto påpa’ gi hilo’ tåno’. Annai tumunok påpa’, ha baba i balutån-ña mångga, lao ti bunito esta i kulot i tinife’-ña mångga.

No comments:

LinkWithin

Related Posts with Thumbnails