Friday, January 15, 2016

Puntan Patgon

-->
Ti Guahu tumuge' este na estoria, lao fihu hu sangan este na estoria gi klas-hu siha yan gi me'nan i famagu'on-hu. Estoria na estoria ni' mafa'na'an "Puntan Patgon." Este na estoria put i fihu na prublema siha gi familian Chamorro (yan gi todu i familian taotao). Achokka' mamparerentes, guaha nai ti maniniha put chinatkomprende. I Puntan Patgon na estoria uma'aya yan i estorian "Sirena" sa' i dos put i prublema anai ti manafa'maomaolek i manaina yan i famagu'on, sa' binibu pat hinesguan umentalo'. Hu hahasso este na dos na estoria todu tiempo, ya i mensahi gumigiha mo'na komo tata.

*************

        Åntetes na tiempo gi tiempon i man mofo’na na taotao eståba un taotao i na’ån-ña si Masåla. I gima’-ña gaige gi inai giya Tålagi Si Masåla gof banidosu sa’ pudi sumen dangkolo yan sumen metgot gue'. Mansen ma'åñao i Chamorron Guahan.  Tåya' gi isla siña umigi si Masåla.

        Guaha lahi-ña si Masåla.Guiya para u sen dangkolo yan sen metgot lokkue'.Banidosu gi tutuhon si Masåla sa’ dangkolo, metgot yan tomtom i lahi-ña.

         Maloffan i tiempo ya matulaika sinente-ña si Masåla. Imbidiosu nu i lahi-ña sa’ i dinangkoloña yan i minetgot-ña.Ha emmok i lahi-ña. Tres åños ha’ i patgon  idat-ña annai lini’e’ as tatå-ña gi inai na humugågando. Gi un kånnai ha gogo’te i hachon, i otro kånnai gaige gi hålom i ngilo’ gi pappa’ trongkon niyok.

        Finaisen as tatå-ña i patgon. “ håfa bidada-mu guennao?” “ para bai hu fangonne’ pånglao lao ayugue ayuyu , bai hu konne’ i ayuyu, malago’ hao un li’e’?” Ilek-ña i patgon. Ha bokbok i patgon i trongkon niyok. Sin håfa na minappot, ina’atan ha’ as Masåla. Sumen lalålo’ si Masala. Embidiosu mampos si Masåla nu i lahi-ña.

        I patgon ha atan ya ha ripåra na sumen lalalo’ si tatå-ña. Ha yute i hachon, ma’åñao i patgon gi as tatå-ña, malågu para i halom tåno'. Tinattiyi as Masåla asta ki måtto giya Hinapsan, i linihan-ña i patgon tuma’yok gi kantet. Sumen dangkolo i tina’yok-ña ya sumen chågo i linagua’-ña måtto ha’ Luta.

        Meggai taotao sumåsangan na siña un li’e’ i fegge’i akague na patås-ña i patgon giya Hinapsan gi kantet ya fegge’ i agapa’ na patås-ña siña lokkue’ ma li’e’ giya Luta.


No comments:

LinkWithin

Related Posts with Thumbnails