Manmesngon hit na Taotao
-->
Anai
manmakolonisa hit gi fine’nina biahi, meggai giya Hita manohge para u fanmumu,
ya maseha manmapede’ hit gi gera, gi minagahet sigi ha’ hit manresiste lao gi
otro manera.
I anten i
Maga’haga-ta lala’la’ ha’ gi hagan haga’, I haga’ Famalao’an. Ya maseha meggai
na famalao’an Chamorro manasagua yan otro rasa, ma na’siguru na ma kontinuha
mafa’na’gue i famagu’on ni’ i fino’-ta yan hayi siha. (komo Chamorro)
I ine’son-ta
nu i Espanot annok gi che’cho’ Juan Malo, gos petbetso kontra i Espanot. Sesso
di ha usa i inutguyosu kontra siha. Sesso di ha fa’chada’ I Espanot yan ha
fa’baba nu i salape’-niha.
Gi duranten
i 19th century, dos Chamorro, Si Jose Salas yan Si Luis Baza, mausa
diferentes na manera para u ha tachuyi i direcho i taotao-ta. Si Baza matungo’
put anai ha konne’ i Gubietno Espanot para kotte put todu i malabida-na kontra
i taotao-ta. Gi 1884 Si Jose Salas, un Chamorro gi i militat Espanot, mamuno’
Gubietno Espanot put i estao i taotao-ta.
Anai
manmatto i Amerikanu, ta kontinuha magkalalamten para I direcho-ta. Gi 1901 i
taotao-ta ta na’hanao i fine’nina entre meggai na “petition” para Washington
ni’ mangagagao direcho para I taotao-ta. Ma sosohyo’ i Estados Unidos para u
mapraktika i prinsipat-niha ya u mafa’taotao i Chamorro.
Ta sungon
todu diskirminasion gi papa’ i Navy, taiguihi anai manmakonne’ todu i
familia-ta yan mamparientes-ta ni’ manatektok ya manmapongle giya Ipao.
Sesso ta ayuda siha umeskapa para u
makonne’ tatte giya Hami.
Gi Tiempon
Chapones, achokka’ bula dañosu yan malabida kontra i Chamorro, ta sodda’ animu
para ta kontinuha i lina’la’-ta.
Pa’go na
tiempo sigi ha’ ta konsigi i hagas payon-ta para ta fanmataknga gi todu asuntio
put tano’, war reparations yan “decolonization.”
Comments