Thursday, May 05, 2011

Taigue Yu'

Despensa yu' na didide' ha' tininge'-hu gi este na ma'pos na simana.

Para bai hu falak sanlagu ta'lo gi i otro'na na simana. Esta mas ki dos anos desde sumaga' yu' guihi. Magof hu sa' para bei in hami yan Si Sumahi, i hagga'-hu. Magof yu' na para u fanali'e' Si Sumahi yan i otro na familian-mami giya Kalifotna.

I otro na simana i uttimo na simanan gi este na semester-hu, ya humuyongna bubula i che'cho'-hu.

Pa'go (put fin) hu na'funhayan un cho'cho' nai hu transladayi GHURA dokumento siha put Fair Housing. Sen makkat este na cho'cho', sa' meggai na sinangan yan palabras gi ayu na papet siha ni' taya' nai hu hungok gi fino' Chamoru.

Gi este mamaila na bakashon para bai hu fanaplika cho'cho' ta'lo giya UOG. Esta macho'cho' yu' guini para dos na sakkan, lao ti petmanente i puesto-ku. Este na cho'cho' ni' bai hu aplikayi "tenure track" ya pues gof excited hu na para bai hu aplika, ya puede ha' bai hu maayek.

Hu kekena'funhayan lokkue' un tinige'-hu para un academic journal. I tinige'-hu put "solidarity" yan "imagination" and put diferentes na ineyak-hu annai humanao para Hapon yan South Korea gi i ma'pos na sakkan. Esta kana' munhayan i tinige', hagas ha' matuge' gui'. Lao annai mareview i tinige'-hu humuyong diferentes na suggestions put taimanu na sina hu fa'maolek gui'. Ya pues ayu hu kekecho'gue pa'go.

Ya put i tinane'-ku lokkue' hassan na humugando yu' gi Kareran Estreyas 2 (Starcraft 2) gi este na ma'pos na simana. Sen mahalang yu' para ayu na huego. Esta listo yu' para bai hu fanungat Terran yan Zerg ta'lo ni' Void Rays.

Este munhayan este na post, sa' sen matuhok.

Lao antes di na humanao yu', atan put fabot este na litratu. Malitratu este gi i ma'pos na simana, annai manhike ham yan noskuantos na estudiante-ku (iyo-ku "nerd crew") yan atungo'-hu siha giya Hila'an. Manaligao ham gi i halomtano' gi i kanton tasi. Gi i mamokkat-mami in fakcha'i mas ki 50 na latte. Gi este na litratu, mane'essitan ham gi oriyan i fine'nina na tumotoghe ha' na latte in sedda'. Ti hu hasso hafa mismo i essitan, lao siempre na'chalek sa' atan ham.

No comments:

LinkWithin

Related Posts with Thumbnails