Tuesday, May 16, 2006

Tinituhun Famoksaiyan

Gi i mamaila na simana, para bei in fandana' ta'lo para Famoksaiyan. Esta hu post put este, pues yanggen gaiinteres hao, email ha' yu'. Hu pega i infotmasion noskuantos na dihas tatte.

Gi este na espiritu, bai hu peggayi hamyo pa'go este na pinagat-hu na hu taitai gi i tinituhun Famoksaiyan gi i ma'pos na mes. Achokka' i manmatto para Famoksaiyan mostly ti sina fumino' Chamorro, hu baba i dinana' ni' este na pinagat gi fino' Chamoru, sa' ti debi di famleffa na guaha lenguahi-ta! Achokka' mas fa'set pa'go na manakuentusi hit gi fino' Ingles, i tinaya', i absence kumekuentos gui' lokkue, ya guaha nai gi i mamatkilu-na, mas a'gang kinu hafa oppan. Debi di ta hasso este.

Tinituhun Famoksaiyan:

Si Yu’us Ma’ase todus hamyo para i finatton-miyu, este na gofha'an na ha'anin.

Antes di tutuhun, nihi ta fanhasso i manmofo’na. Siha ni’ manmatto fine’nina. Siha ni’ gaigaige ha’ gi i halom tano’, gi i hagga’-ta, i hanom-ta, i hinagong-ta.

I kinalamten i gefes-miyu, i hila’n-miyu, i kannain-miyu.

Mungga ma hasso na gaige ha’ este siha gi i fanma’pos’an, guatu gi i tatte-ta. Mismo gaige guini gi sanhalom-ta, esta, kada diha, todu tiempo.

Ayugue i finayin i palabra “taotaomo’na.” Este i taotao ni’ mo’na gi tiempo, ni’ esta maloffan.

Lao este i taotao lokkue ni’ mo’na, gi tiempo, ni’ mamamaila.

Todu tiempo, achagigu gaige i espiritun i manaina-ta, gi sanme’na-ta yan gi i santatte’-ta.

Hasso yan na’setbe i finayi, ni’ chumalani i taotao-ta desde i tinituhun.

Hasso yan na’setbe i minetgot ni’ muna’fanungon i taotao-ta, ni’ gera, ni’ pakyo, ni’ chetnot.

Ekungok nu este na kanta, tinige’ Si Carlos Taitano’

Galaide, Galaide, Tunas mo’na gi hilo’ tasi.

Galaide, Galaide, Fa’nu’i hami i guinahan i tasi.

Hu takpangi este na dinana’ “famoksaiyan” put i sanhalom-na este na kanta. Hita i hagga’n, i telang, i kinedon ni’ muna’hanao mo’na i galaide. Lao i che’cho’-ta lokkue, na ta fa’tinasi hit este na batko, na ta fa’tinasi i manmamaila lokkue este na batko.

Olaha mohon yan i finayin yan irensian i manaina-ta, siempre sina hit. Siempre.

Si Yu'us Ma'ase ta'lo.

No comments:

LinkWithin

Related Posts with Thumbnails