Dos Pitduras

Nigapna, umakuentusi ham yan i ga'chong-hu put i sinienten-mami put i activism-mami, ya lana taimanu sesso duru yan fihu kalang machaleghua ham, put i minakkat-na hafa in tingo', yan hafa in tingo' na debi di u macho'gue. Mana'hasso gui' i ga'chong-hu put i kachido (mubi) Matrix, yan i dos na pitduras (pills) ni' Si Morpheous umofresi Si Neo. Unu na pill pau fina'nu'i hao i minagahet put i eriya-mu, i otro pau nina'bense hao ta'lo na todu maolek, ya pua laknos i chinatsaga-mu (yan i inebra-mu lokkue).
Gi i che'chon-mami, fihu in siente na debi di mampos annok manu debi di un ayek. Unu para u binabayi hao ni' atadok-mu, i otro para u nina'maya' ha' ta'lo i inatan-mu. Lao sa' hafa i meggaina na taotao Guahan, manma'a'nao nu i pitduras minagahet, ya ga'o'-niha i pitduras binachet?

Yanggen un atan i isla-ta pa'go, ti mappot para un sodda' un repuestas para este finaisen-ku.

Para i pitduras binachet, kalang mafalulon gi un banderan Amerikanu. Kalang ma sumai gui' gi i salapen militat. Achokka' i lina'la' ni' munanangga despues di un panot este na pitduras ti taikachang, maolekna kinu i otro. I otro na pitduras, hunggan madulok ni' minagahet, lao ti chuilong i minagahet yan i minagof. Fihu ma sangan na i mas magof i taitiningo' kinu i gaitiningo'. Ya magahet este na sinangan guini giya Guahan. Todu i dinagin colonialism, mandadana' siha gi un gof dongkalo na "ad campaign" para u pugi hao na este na pitduras, Guiya i empenu, Guiya i chalan-mu para minagof yan sinafu.

Yan hafa gaige gi i otro pitduras? Hafa sina ha na'i hao? Hafa sina ha cho'guiyi hao? Ti meggai, fuera di i minagahet. I otro na pitduras, bubula' ni' minagahet, yan ti minagahet otdinariu este, lao minagahet minakkat. I minagahet i eriya-mu. I minagahet put sa' hafa taiguini este na isla. Yan este na minagahet ti sina kumetu, yan todu i tumutungo' put Guiya, ti sina mangetu lokkue'. Este na pitduras i amot i activist, i mina'kalamten-niha.

Yanggen un akompara este na dos pitduras, unu bubula' ni' prinemeti, ha promemeti hao todu i mundo yan todu i riniku gi hilo' tano'. I otro, taya' prinemeti-na, fuera di na este i minagahet. Ti ha promemeti hao minagof pat un trankilo na hinasso. Todu i sinangan-na, na ti magahet yan lachi i tano' yan debi di u matulaika.

Lao i prubleman este, i rason na kumuenkuentos ham yan i ga'chong-hu put este nigapna, put i ti nahong i minagahet. Gof maolek na gaige gi fi'on-mu i minagahet, yan gaige gi i fino'-mu lokkue', lao ti nahong este para un tulaika i tano' yan i taotao.

Fihu ta hasso, na gigon na mafakcha'i i minaghaet, manmafatto hit gi i finakpo' yan makpo' i karrera-ta. Lao gi minagahet, i minagahet dipotsi i tinituhun. I minagahet sina gui' chumalani hit mo'na, lao ti nahong. Estague i minakkat este na lina'la' activist. Meggaina i salape', meggaina i taotao gi i otro banda. Meggaina i kumakanno' i pitduras binachet. Menosna i salape'n-mami yan i tiguang-mami gi este na banda. Este diferensia kumekeilek-na na mas dongkalo i che'chon-mami (lao mismo i che'cho'-ta).

Lao kao maolekna na hu ayek i otro na pitduras? Achokka' gof mappot este na chalan na inayek as Guahu, kao malago na para bei tulaika i inayek-hu?

Ahe'. Maskeseha, makkat este na obligasion-hu, ya hu admite este gi i na'an iyo-ku blog (No Rest for the Awake), ga'na-ku na para bai hu gaige gi i bandan minagahet kinu i bandan dinagi tinaitiningo'.

Comments

Popular posts from this blog

Chamorro Public Service Post #15: Pues Adios, Esta Ki

Tuleti

Guam: The Movie