Mas Ki Dichicheng

Ilek-na Si Henry Kissinger, ayu na sen dangkolu na galabok taotao, put iya Micronesia, “There are only 90,000 people out there. Who gives a damn?” I meggaina na taotao guini ti ma tungo’ put este na sinangan ya ti ma tungo’ lokkue’ hayi este na Henry. Lao para i manggaitiningo’, ti mannina’manman nu este. Ayu na hinasso, ayu na pine’lo, put i mineddong-ta guini gof annok gi i na’an-ta. Atan i na’an ni’ mana’i hit para este na lugat: Micronesia. Kumekeilekna “dikike’ na isla.”

Sigun hafa hu fa’na’an i “pragmatics of size” taya’ gaibali giya Micronesia, todu taibali. Hunggan, buente anggen malago’ hao bumuteya hanom tasi, sen gefsaga’ este na lugat. Lao dinirihi i hinasson i taotao sanhiyong ni’ tano’. Ayu nai muna’hasso siha put finitme, siguridad, yan anggokuyon na fuetsa. Para siha i hanom yan i tasi, ti anggokuyon, machalek, todu tiempo matulailaika. Todu i tumuge’ i Bipblia ginen ayu na hinasso. Hafa ilek-na guihi put este? Estague ginen as San Mateo:

Enao i humungok este siha i sinangan-hu ya fuma’tinas, guiya parehu yan i menhalom na taotao ni ha fa’tinas i gima’-na gi hilo’ acho’. Ya u tunok i ichan yan u fanmatto i saddok, yan u fanmanguaife i manglo, ya u hinatme ayu na guma’. ya ti u poddong, sa’ mafa’tinas gui’ gi hilo’ acho’. Lao ayu i humungok este siha i sinangan-hu ya ti fuma’tinas, guiya parehu yan i bababa na taotao ni’ ha fa’tinas i gima’-na gi hilo’ unai. Ya u tunok i ichan, yan u fanmatto i saddok yan u fanmanguaife i manglo ya u hinatme ayu na guma’, ya gos dangkolu i pineddong-na.

Antes di manmatto’ magi ya ma sagayi hit i mangilagu, esta gof tadhong este na ideha gi hinasson-niha. Gaihinasso i umanggongokko i acho’ yan i tano’, lao taihinasso ayu i umanggongokko i inai, i masmai na tano’, un manana na mesklao. Pues para siha, achokka’ sigi ha’ ma fa’ganye i isla-ta siha put strategic importance, sigi di ma sangan lokkue’ na ti nahong hit, ti dangkolu hit, taibali hit. Ti nahong i tano’ yan i acho’ gi i Tasin Pasifiku ya humuyongna ti nahong hit guini komo taotao, kuttura yan nasion. Este na fina’ga’ga’ na hinasson mafa’tinas huyong gi otro tano’ siha, lao hagas matanom i simiyan ti nahong yan ti bali guini, ya meggai giya Hita esta umaksepta ayu na baba na ideha siha komo minagahet.

Anai ta atan mo’na gi kinalamten pulitikat, sina ta li’e’ un otro hiniyong put este. I ideha na ti nahong hit komo taotao chumalani i hinasso-ta guatu para i ideha na ti kabales hit na taotaogues lokkue’ Humuyong ginen este fehman na sinienten dependensia. Put i dinikike’-ta gi i tano’-ta siha yan gi kuttura-ta siha, debi di ta espiha i kinabales-ta gi otro banda, gi i estorian yan kutturan un otro taotao yan otro na nasion. Mampayon hit nu manhahasso na “menos di…” hit na klasin taotao todu tiempo. Menos di i Chamorro kinu i Amerikanu. Menos di i Chamorro kinu i Espanot. Menos di Guahan kinu todu i otro na nasion siha. Esta o’sun yu’ nu este. Kalang un be’be’ namu mas esta ki tano’ tinaya’ya’.
Lao para Guahu, malago’ yu’ muna’famta i sinangan “mas ki…” Anai ta atan masia hit, debi di ta gof siente yan na’la’la’ gi lina’la’-ta i minatatnga gi ayu na gof matungo’ na sinangan Hurao, “Metgotna hit kinu ta hongge.” Mas ki dinichicheng na tano’ hit. Mas ki trongkon niyok ha’. Mas ki bases yan BBQ hit. Mas ki Amerikanu siha ni’ mannanangga taihinekkok para u fanamerikanu.

Comments

Popular posts from this blog

Chamorro Public Service Post #15: Pues Adios, Esta Ki

Tuleti

Guam: The Movie