Leeward

Lumiliko' yu' gi i "Leeward" na banda gi i ma'pos na simana giya Oahu.

Un atungo'-hu, malago' gui' fuma'nu'i yu' hafa ha fa'na'a'an i magahet na Hawai'i, ya pues in hami humanao.

Ti hu gof tungo' ayu na banda. Estaba managa' ham giya Kunia, anai Si tata-hu macho'cho'cho' gi Del Monte gi fama'yan pina siha. Hu gof tungo' iya Manoa yan iya Honolulu, put i Unibetsedat yan i malls siha guihi.

Lao unu pat dos biahi ha' di hu bisita i Leeward na banda.

Gi minagahet sen gefpago este na islan Oahu. Lao para Guahu mas hu ripara i chinatpago, put hemplo i mantaiguma', i tahdong na fina'militat, ya taimanu na masasakke' ha' kada diha i tano'-niha i mannatibu na Hawaiian siha. Put este siha mas na'triste este na lugat. Ti ya-hu bumisitanaihon.

Ai adai, i pumasehun-mami nigap, ha na'gasgas i ante-ku. Ginen sanlagu yu', ya hunggan gof gaiprobechu i bida-hu guihi para i Prugraman Inestudian Chamorro. Lao ha na'yafai yu' lokkue'. Ya desde matto yu' guini giya Hawai'i, gof kalang taitintanos yu' (zombie).

Lao anai hu pacha' i asutttttt na hanom gi i kanton tasi Leeward siha. Anai mamokkat yu' gi i kanadan sagradu guihi, ha fa'tinas yu' komo nuebu. Ha na'homlo' i matitek na ante-ku.

Hu sen agradesi este. Estaba i estaon Hawai'i sesso ha tife' yu'. Lao ya-hu este na biahi na hafa hu susedi guihi, ha na'la'la' yu'. 

Comments

Moñeka said…
Na munngie eyi na estoria mu. Fan magof ha' sa un sodda I hinemlomu

Popular posts from this blog

Chamorro Public Service Post #15: Pues Adios, Esta Ki

Guam: The Movie

Tuleti