Mensåhi Ginen i Gehilo' #26: Kao pau hånao ha' si Uncle Sam?

"Kao pau hånao ha' si Uncle Sam, anggen manindipendente hit?"

Fihu hiningok-hu este na chathinasso ginen i kumunidåt. Anggen mamindipendente hit, u fanmalingu siempre todu i kosas motdeno. U hånao ha’ si Uncle Sam, pau dingu hit ya pau laknos yan bo’ok todu i chinile’-ña mågi.

Ti magåhet este. Fihu ti ya-ña i Estådos Unidos umatmitde este, lao guaha obligasion-ña nu hita. Put i ha fitma i charter para i Unidos Nasiones, ha aksepta i responsibilidåt, este mafa’na’an “inanggokko sagrådu” a sacred trust. Na para u ga’chungi hit gi este na chålan mo’na. Guaha meggai na klasen ayudu na ha oblibliga muna’guaha, lao para este na kuestion, uno mås propiu para ta diskuti, i tiempon “transition.”

Este na klasen kontråtan, fihu masusedi gi taiguini na klasen tinilaikan pulitikåt gi otro na tåno’ lokkue’. Siña este na tiempon tinilaika tinaka’ uno año, tres años, dies años, pat bente pat trenta años. I inapmåm-ña ha dipepende gi håfa diniside ni’ dos na nasion.

Gi este na tiempon, mananegotiate i colonizer yan i nuebu na nasion, put i chalan mo’na, ya i colonizer ha guahåyi diferentes na fondo yan fina’profesionåt ni’ pau ayuda i nuebu na nasion tumutuhon yan na’lå’la’ i nuebu na ekonomia yan para u chule’ kabåles na podet gi gubetnamento yan i diferentes na ahensia.

Este ginen i Bradley Report, makumple este gi Dos Mitt, lao gaibabali ha’ para ta komprende este na asunot. Gi este na påtte ha diskuti i Tiempon Tinilaika pat Tiempon Tinahgue. 

“As a part of the negotiated provisions for Guam’s transition to independence, it is anticipated that the island will receive substantial economic development funding over a period of 15 or more years, partly in exchange for U.S. military access rights in Guam. This funding also includes amounts negotiated to remedy infrastructure and environmental issues that were left unresolved prior to the status change. The U.S. State Department will administer this composite funding program.”

- Economist Joe Bradley, “An Analysis of the Economic Impact of Guam’s Political Status Options (2000)” 

Guini giya Guåhan, debi di ta na’hasso i Estados Unidos put este na obligasison-ña. Debi di ta fanmanespiha otro ga’chong na gurpu yan nasion ni’ siña umayuda hit dumekka’ i Estados Unidos.