Inestudian Chamorro

Para åpmam na tiempo i hinasson-ña i taotao Guahan gof “colonial” put hafa siña ta ofresi i mundo. Iya Guahan un gof dikike’ yan chågo’ na isla. I Mañamorro un gof dikike’ na taotao, mandåñu nu “colonialism” yan tåya’ esta perfekto puro’ put Guiya yan i kutturå-ña. Tåya’ sibilisaion-ña. Humuyongña, para tiningo’, pi’ot tiningo’ edukasion, siempre tåya’ guini lokkue’. Anggen un hongge este na “colonial” na hinasso, pues edukasion, mismo put i matulaikakå-ña i “local” esta ki i hineggen yan i tiningo’ sanhiyong tumahgue gui’.  

I Unibetsedåt Guahan, taiguihi i meggaiña na institusion edukasion gi i estorian Guahan, mafa’tinas ni’ este na klasin hinasso. Gi tinituhun-ña, ha fa’sahnge yan ha hoño’ i tiningo’ i Chamorro ya ha gof representåyi i fuetsan i tiningo’ sanhiyong. Put este, ti mismo membro i unibetsedåt gi kuminidåt, mismo ma’ma’ya gui’ gi hilo’ i taotao guini. I manggaige gi halom i unibetsedåt ma atan papa’ i taotao tano’ ya ti umachetton magåhet i dos. 

Lao meggai matulaika desde mafa’tinas UOG, gi tano’ etiningo’ yan giya Guahan lokkue’. I Unibesedåt Guahan, esta pumåra gui’ sumasahyan ni’ muna’famatkikilu i Chamorro. Pa’go mafana’gue guihi i lenguahin Chamorro yan i Estorian Guahan. Lao Ti nahong este anggen ya-ta na gaimamahlao i unibetsedåt nu i kuminidåt.

Pa’go na tiempo, guaha dångkolu na diniskuti gi UOG put taimanu na siña ha na’lahihot gui’ yan i kumunidåt. Un gof impottånte na påtte gi este na diniskuti, hafa mismo siña ha entrega i mundon tiningo’? Hafa siña i mas gaibali na finattå-ña? Hafa siña chine’gue as Guiya mas maolek yan mas kapas kinu todu i otro koleho siha gi Estådos Unidos, giya Asia yan gi i mundo? Gi maseha na listan respuesta para este na finaisen, siempre gaige yahulolo’ “Inetudian Chamorro.” I Unibetsedåt Guahan, siña gui’ ya debi Guiya i ma takhilo’ na lugåt para todu inaligao put i Chamorro yan Chinamorro, i estoria-ña, lenguahi-ña yan i kuttrå-ña

Para i manetiningo’ siha put linenguahi, tiningo’ put taotao, tiningo’ sosiat, tiningo’ pulitikåt, yan otro taiguihi na inaligaon tiningo’, iya Guahan yan i Chamorro gaiestoria siha ni’ gof interesånte. Iya Guahan un gof maolek na lugåt para i maestudia-ña “colonization” gi ma’pos yan i pa’gogo na tiempo. Guini lokkue’ siña un gof estudia “fina’militat” gi handan tåno’ yan taotao lokkue’. Giya Guahan siña un li’e’ taimnua na kana mafunas hun un kuttura, ya taimanu mana’la’la’ gui’ lokkue’. Gi Fino’ Chamoru siña mañodda’ hao estoria put un sen mesngon yan ma’ok na lenguahi. Achokka’ ha sungon meggai yan mipaladan gui’, mau’usa ha’. Lao siña un li’e’ lokkue’ i kalang ti hongge’on na minalingu-ña desde i Tiempon Chapones. Cho’cho’ kuminidåt para todu este na asunto siha siña minaneha gi i Unibetsedåt Guahan ni’ Chamorro Studies. Para todu prugrama yan inestudia nu este na asunot siha, siempre UOG i mas “naturåt na inayek.” Este na magåhet na bali-ta, debi di ta na’lasetbe.

I bali-ña Chamorro Studies put taimanu siña ha na’lamafñot i Unibetsedåt yan i kumunidåt, ko’lo’lo’ña i mannatibu, i Mañamorro. Anggen manmalago’ hit tumulaika mo’na este na unibetsedåt, debi di ta na’laaya siha yan i taotao guini. Desde i tinituhun-ña este na unibetsedåt, hunggan ha fanå’gue i Chamorro siha, lao ti nahong este. Ti mismo gairespetu este. I unibetsedåt debi di ha estudia komo gaimamahlao, i tiningo’, lenguahi, yan kutturan Chamorro. Ya debi di ha rekoknosi lokkue’ i bali-ña.

Esta lini’e’ UOG ni’ kumunidåt komo un lugåt nai mafana’na’gue i lenguahin Chamorro yan i estorian Guahan. Yanggen ta usuni umatbånsa Chamorro Studies, siña ta na’lafitme ayu na inanggoku para i publiko, ya gi tiempo siña ta fa’nu’i siha na este na unibetsedåt mismo iyo-ñiha lokkue’.