GMIF gi Fino' Chamoru
Pedro Onedera
Guam PDN
5/21/13
Desdeki i ma babaña astaki i finakpo'ña i Mina'bente sais na Ferian Islan Maikrunisian Guåhan, sigi ha' hålom i finatton i taotao siha.
Guaha inapurao, minannge' prugråma, kulot yan inafa'maolek gi i tres ha'åni na feria ni', sigun gi ma muebi para mes Måyu, bula minagof put i atte, fina'tinas cho'cho' kånnai, tradisiunåt, tinalenti yan finatta ni' prinisenta nu i taotao tåno' ginen Republic of the Marshalls, Republic of Palau, Yap, Pohnpei, Chuuk, Kosrae ginen iya Federated States of Micronesia, yan ta'lo ginen iya
Commonwealth of the Northern Marianas yan islan Nauru. Desde franela, åtten botto, linasguen håyu, todu klåsen inatan åtte taiguihi litråtu siha, tiniffok, finattan agrikottura na tinanom, yan i petlas siha ginen islan Nukuoro, un islan Pålinesia gi iya estådon Pohnpei, bula siha na kosas para todu i taotao, manhoben yan manåmko'.
Debidi u ma nota na i tasen humanidåt ni' eståba guihi yan un nina'håssan gi iya Guåhan, tåtkumu para guåhu, mesklao lengguåhi siha un huhungok entre finatton taotao yan i mañåsaonao gi finatta yan binende na bånda. Ha upos chi-ña iya Guåhan på'go na såkkan ya dångkolo na agradesimento u ma nå'i i Setbision Bisitan Guåhan, i ayudånte ginen pumalu ahensian Gubetnamenton Guåhan yan kumetsiånte siha yan put uttemo i minaolek kinalamten na cho'cho' ni' pribiniyi ginen Gurupon Galaide' Guåhan.
Tåtkumu sumaonao yu' bumulontåriu gi i feria, banidosu yu' kada hu hanaogue i tento' siha ya umali'e' yu' yan manåttesta, yan manhusga yu' para i kompetasion inadotnan sagan åtte siha. Ha miresi rikoknision i tres na manmanggåna, fine'nana na premiu iya Star of Tahiti, i sigundo na premiu iya Ifit Addao yan i tetset na premiu iya Chamorrita Girl sa' magåhet manmappot para u ma adotna sagan-ñiha ni' naturåt na tinanom flores yan mikulot yåtdas magågu yan lokkue' tråstes siha ni' ha riprisenta kotturan-ñiha lao lokkue' i minannge' siñente kada ma abiba i finatton bisita guatu gi tento'-ñiha. Debidi u ma ekstende este na onra para i pumalu ni' mañaonao lokkue' sa' manggånnadot ha' ta'lo.
Este na siñenten inabiba para bisita siha gof tåddong gi i durånten tres ha'åni ya i paopao tininon nengkanno' gi sagan fañochuyan parehu yan i gimen siha taiguihi smuthi, sheif ais yan manengheng setbesa numa'månnge' i tiempo achokha' gof maipe tåtkumu umidu yan ma'lak somnak.
Maloffan anåkko' na tiempo desdeki maolek i klema gi i Ferian Islan Maikrunisian Guåhan sa' gi manmå'pos na såkkan siha ma go'te i aktebedåt gi talo' tiempon fanuchånan.
Gi tres puengi, yampak i lugåt annai manmane'egga', manmane'ekungok, yan mambabaila i taotao siha gi i dandan Tribal Theory, un ban San Diego ni' membron-ñiha klumåma na mañainan-ñiha mangginen Guåhan. Un taotao gi tapblon yåbi yan kåntadot as Parker Yobei ni' hu li'e' gi ma'pos na såkkan gi i Ferian Kotturan Chamorro ni' pinatlinuyu nu i Otganisasion CHe'lu ya ma go'te gi iya San Diego Market Plaza, måtto di ma guaiya nu i taotao guini. Put i hihihot yu' gi sisenta åños ya ha afekta yu' i musika ginen as Parker Yobei, duru yu' bumaila lokkue'. Fresko yan senmaolek gui' para guåhu.
Ha yunga' litratu-hu un senmaolek na yininga' åtte as Chris Mahilum ni' duru ha na'chålek yu' ni' frihon-ña yan estoriå-ña put pulitikåt siha. Sesso di hu chomma'-maisa yu' yanggen para bai hu ma yungå' pusision-hu sa' sentakpapa' komfiansiå-ku para este na manera, lao ha na'senmagof yu' ni' bidå-ña nu guåhu.
Unu hu tungo' put guiya si Chris na gi magåhet i na'ån-ña si Peter ya i kompli'años-ña pumoddong gi diha despues di i mafañagu-hu, parehu na såkkan. Senhåssan hu fakcha'i taotao siha ni' parehu osino hihot kompli'años-hu ya kulan hu pega na ga'chong-hu esta. Put mås, bisa-prisidente gui' para i Asusiasion Åttestan Filipinu ya i prisidente si Rolly Zepeda, un maolek åttesta ni' ga'chong-hu ha' lokkue'.
Gi otro na lamasa gi otro na tento' na eståba i Rinihistran Decolonization ni' ma kalamtitini ginen ufisinan Sinadot Ben Pangelinan. Hihot yu' yan este na asunto guihi na lamasa sa' put i hagas hu eppok estodiante-ku siha gi iya Unibetsedåt Guåhan para u ma rihistra siha gi iya Kumision Ileksion Guåhan gi kada simesta annai eståba yu' guihi. Put i manåtatte na tiempo na asunto, ha patitiki i Rinihistran Decolonization yanggen para u fanman ayek i tinaotao put estao pulitikåt Guåhan tåtkumu indipendiente, estådu osino asusiåsion linibette.
Hagas di gaige este na asunto såkkan put såkkan ya ohalåra mohon na u ma atendi este gi ti åpmam na tiempo. Hu tayuyuyuti na gi durånten ha'ani-hu na u posipble este.
Gi i lamasa, kumuentos yu' åpmam yan si Karen Charfauros put i noskuåntos taotågue esta manma rihistra yan put i hinasso-ña put este na asunto. Duru ha' i taotao manmåtto guatu para u fanma rihistra ya senmagof yu' na pumosipble este na cho'cho' gi durånten i Ferian Islan Maikrunisian Guåhan piot para ayu i ti tumungo' ha' put este na kinalamten ni' chinechennek as Sinadot Ben Pangelinan.
Hunggan, maolek i tiempo yan i fuetsa para i Ferian Islan Maikrunisian Guåhan para i finatto annai manma fatta, manma monstra yan manma bende kosas siha. Ma silebra lokkue' i mina'singkuenta åños-ña i Setbision Bisitan Guåhan.
Comments